Category: ၂၀၁၀ရွေးကောက်ပွဲသတင်း


စစ်အစိုးရက မကြာမီ ရွေးကောက်ပွဲ ပြုလုပ်ပေးမည် ဆိုသော်လည်း နေပြည်တော်တွင် တည်ဆောက် နေသည့် လွှတ်တော် အဆောက် အအုံကြီးမှာ ပြီးစီးခြင်း မရှိသေးကြောင်း စုံစမ်းသိရှိရသည်။

ဧရာဝတီမှ ရရှိသည့် ဓာတ်ပုံတပုံတွင် ရှေးဟောင်းလက်ရာ စုလစ်မွန်းချွန်များနှင့် လွှတ်တော် အဆောက်အအုံကို ငြမ်းများ တပ်ဆင်ထားပြီး အလုပ်သမား ရာပေါင်းများစွာဖြင့် တည်ဆောက်ဆဲဖြစ်ကြောင်း တွေ့ရသည်။

မကြာသေးမီက တွေ့ရသော နေပြည်တော် ပြည်သူ့လွှတ်တော် အဆောက်အအုံ တည်ဆောက်ရေး မြင်ကွင်း (ဓာတ်ပုံ – ဧရာဝတီ)

မကြာသေးမီက နေပြည်တော်သို့ ရောက်ရှိခဲ့သည့် Reuters သတင်းထောက် ပေးပို့သည့် သတင်းတပုဒ်တွင်လည်း “လုပ်ငန်းတွေ ပြီးဆုံးဖို့ အများကြီး လိုသေးတယ်၊ လမ်းတွေလည်း မပြီးသေးဘူး၊ ဆေးတွေလည်း သုတ်ရအုံးမယ်” ဟု ဖော်ပြထားသည်။

ယခုနှစ်တွင် ရွေးကောက်ပွဲကို စနစ်တကျ ကျင်းပပေးရေးအတွက် စီမံဆောင်ရွက်လျက် ရှိကြောင်း ဗိုလ်ချုပ်မှူးကြီး၏ ၆၂နှစ်မြောက် လွတ်လပ်ရေးနေ့ သ၀ဏ်လွှာတွင် ဖော်ပြထားသည်။

သို့သော်လည်း ရွေးကောက်ပွဲ အချိန်ဇယား အတိအကျ ထုတ်ပြန်ခြင်း မရှိသေးပေ။  မကြာသေးမီက ဂျပန်နိုင်ငံထုတ် အဆာဟိရှင်ဘွန်း သတင်းစာတွင် စစ်အစိုးရက ရွေးကောက်ပွဲကို အောက်တိုဘာလတွင် ကျင်းပမည် ဖြစ်ပြီး၊ ၎င်းရက်သည် ၁၀- ၁၀- ၁၀ ရက်နေ့တွင် ကျရောက်ကြောင်း အမည်မဖော်လိုသူ စစ်တပ် အရာရှိကြီး တဦးကို ကိုးကား၍ ရေးသားထားသည်။

ထိုင်းနိုင်ငံခြားရေးဝန်ကြီး မစ္စတာ ကဆစ် ဖိရုမ်းကလည်း ရွေးကောက်ပွဲ ဥပဒေ ရေးဆွဲမှုသည် ၇၀ ရာခိုင်နှုန်းခန့် ပြီးစီး နေပြီ ဖြစ်ကြောင်း၊ ၂၀၁၀ ရွေးကောက်ပွဲကို ဒုတိယ နှစ်လယ်ပိုင်း၌ ပြုလုပ်နိုင်ဖွယ် ရှိကြောင်း မကြာသေးမီက ဗီယက်နမ်နိုင်ငံတွင် ကျင်းပခဲ့သည့် အာဆီယံ နိုင်ငံခြားရေးဝန်ကြီးများ အစည်းအဝေးတွင် ပြောကြားခဲ့သည်။ သူက စစ်အစိုးရ၏ နိုင်ငံခြားရေးဝန်ကြီး ဦးဉာဏ်ဝင်းကို ကိုးကားပြီး ပြန်လည် ဖောက်သည်ချခဲ့ခြင်း ဖြစ်သည်။

မြန်မာနိုင်ငံရေး အကဲခတ်များကမူ ရွေးကောက်ပွဲ ဥပဒေသည် ရေးဆွဲ ပြီးစီးနေပြီဖြစ်ပြီး ဗိုလ်ချုပ်မှူးကြီး သန်းရွေ၏ လက်ထဲတွင် အဆင်သင့် ရှိနေသည်ဟု ယူဆကြသည်။

ဂျပန်နိုင်ငံသို့ ရောက်ရှိနေသော နိုင်ငံခြားရေးဝန်ကြီး ဦးဉာဏ်ဝင်းက ဂျပန်နိုင်ငံခြားရေးဝန်ကြီး ကက်ဆုရာ အိုကာဒါနှင့် တွေ့ဆုံရာတွင် ယခု ကျင်းပပေးမည့် ရွေးကောက်ပွဲတွင် ပါတီပေါင်းစုံနှင့် ပြည်သူများ ပါဝင်နိုင်စေရန် လမ်းဖွင့်ပေးထားကြောင်း၊ ဒေါ်အောင်ဆန်းစုကြည် ဦးဆောင်သည့် အမျိုးသား ဒီမိုကရေစီ အဖွဲ့ချုပ်လည်း ပါဝင်ယှဉ်ပြိုင်မည်ဟု မျှော်လင့်ကြောင်း ပြောကြားခဲ့သည်ဟု ဂျပန် နိုင်ငံခြားရေးဌာန အရာရှိများက ဆိုသည်။

သို့ရာတွင် နေပြည်တော်ရှိ လွှတ်တော်အဆောက်အအုံ ဆောက်လုပ်ရေး လုပ်ငန်းများ မပြီးစီးသေးသည့် အတွက်  စစ်အစိုးရက ရွေးကောက်ပွဲ ကျင်းပပေးခဲ့သော်လည်း အနိုင်ရရှိသည့် လူထုကိုယ်စားလှယ်များထံ အာဏာလွှဲပြောင်းရေး၊ လွှတ်တော် ခေါ်ယူရေးတို့အတွက် အချိန် ကြာကောင်းကြာဦးမည် ဖြစ်ကြောင်း နိုင်ငံရေး အကဲခတ်များက ပြောဆိုနေကြသည်။
ဧရာဝတီမှတဆင့်

Advertisements

နအဖစစ်အစိုးရ နိုင်ငံခြားရေးဝန်ကြီး ဦးဉာဏ်ဝင်းက ယခုနှစ်အတွင်း လွတ်လပ်ပြီး တရားမျှတသည့် ရွေးကောက်ပွဲ ကျင်းပပေးမည်ဟု ပြောဆိုခဲ့မှုသည် မည်သို့မျှမဖြစ်နိုင်ကြောင်း ရန်ကုန်မြို့မှ တရားရုံးချုပ် ရှေ့နေဟောင်းတဦးက ပြောသည်။
ဗီယက်နမ်နိုင်ငံတွင် ပြုလုပ်နေသည့် အာဆီယံနိုင်ငံခြားရေးဝန်ကြီးများ အစည်းအဝေး တက်ရောက်နေသည့် မြန်မာနိုင်ငံခြားရေး ၀န်ကြီးက အာဆီယံနိုင်ငံခြားရေးဝန်ကြီးများအား ယခုလ (၁၃) ရက်တွင် ပြောကြား ခဲ့ကြောင်း အာဆီယံအတွင်းရေးမှူး စူရင်ပစ်စ၀မ်က ပြောဆိုခဲ့ခြင်းဖြစ်သည်။
ယင်းသို့ ဦးဉာဏ်ဝင်းပြောကြားချက်နှင့်ပတ်သက်၍ ယခင်က တရားရုံးချုပ်ရှေ့နေဟောင်းတဦးဖြစ်ပြီး ယခု ဥပဒေအတိုင်ပင်ခံ တဦးဖြစ်သည့် ဦးအောင်သိန်းက ယခုကျင်းပမည့် ရွေးကောက်ပွဲသည် တရားမျှတသည့် လုပ်ထုံးလုပ်နည်းများနှင့် မညီကြောင်း ထောက်ပြပြောဆိုသည်။
၎င်းက “၂၀၁၀မှာ ရွေးကောက်ပွဲ လုပ်မယ်ဆိုတာကိုလည်း သတင်းစာတွေကနေပြီးတော့ အများပြည်သူသိအောင် ဘယ်ရက် ဘယ်လမှာ အတိအကျလုပ်မယ်ဆိုပြီးတော့ ထုတ်ပြန်ကြေညာထားချက်လည်း အခုထိမတွေ့ရသေးဘူး။ နောက်တချက်က သူပြော၊ ငါပြော၊ ဘေးပြော ထမင်းစားပွဲမှာ နိုင်ငံခြားရေးဝန်ကြီး ပြောတာတွေကတော့ သူတို့ယူဆချက်တွေ သူတို့ပြောတာ ဖြစ်မယ်။ အမှန်တော့ ဒါဟာ နိုင်ငံတခုအတွက် အရေးကြီးတဲ့ အပြောင်းအလဲတခုဖြစ်မယ့် ကိစ္စရပ်ဟာ ရက်တို့အချိန်တို့ ကန့်သတ်ချက် တိတိကျကျဖြစ်ဖို့လိုတယ်” ဟု ပြောသည်။
ထို့အပြင် ရွေးကောက်ပွဲဆိုင်ရာ လုပ်ထုံးလုပ်နည်းအရ ကော်မရှင်အနေဖြင့် မည်သူများ ၀င်ရောက်ယှဉ်ပြိုင်ခွင့်ရှိမည်၊ မည်သူများ ပါတီထူထောင်နိုင်မည့် အနေအထားရှိမည်၊ ရွေးကောက်ပွဲပြီးပါက မည်သည့်အချိန် လွှတ်တော်ခေါ်ယူကာ မည်သည့်အချိန် အာဏာလွှဲပေးမည် စသည့် အသေးစိတ်အချက်အလက်များလည်း ကော်မရှင်အနေဖြင့် ထုတ်ပြန်ခြင်း မရှိသေးကြောင်းလည်း ရှင်းပြသည်။
“၁၉၉၀ ခုနှစ် ရွေးကောက်ပွဲတုန်းကလည်း အဲလိုပဲ ကော်မရှင်ဥပဒေတော့ ထုတ်လိုက်တာပဲ။ အဲဒီမှာ ချန်လှပ်ကွက်တွေနဲ့ ဒီနေ့အထိ ၁၉၉၀ ရွေးကောက်ပွဲရဲ့ရလဒ်က အကောင်အထည်ပေါ်လာနိုင်ခြင်း မရှိသေးတာကို တွေ့ရတာပေါ့။ တရားမျှတတဲ့ ရွေးကောက်ပွဲဖြစ်ဖို့ဆိုတာ တရားမျှတတဲ့ လုပ်ထုံးလုပ်နည်းတွေနဲ့အညီ ကြိုတင်ပြင်ဆင်ရမယ့် အချက်အလက်တွေရှိဖို့ လိုအပ်တယ်။ အဲဒါတွေမရှိသေးဘူးဆိုရင် အဲလိုခြွင်းချန် ချို့ယွင်းနေတဲ့အချက်အလက်ကသည်ပင်လျှင် တရားမျှတမှုကို မဖြစ်စေဘူးလို့ ကျနော်တို့က မြင်တယ်” ဟု ဦးအောင်သိန်းက ပြောသည်။
လက်ရှိစစ်အစိုးရအနေဖြင့် ရွေးကောက်ပွဲပြုလုပ်ပေးမည်ဟု ပြောဆိုနေသော်လည်း ၀င်ရောက်ယှဉ်ပြိုင်မည့် ပါတီများအနေဖြင့် ရွေးကောက်ပွဲကျင်းပမည့်ရက်နှင့် စည်းရုံးလှုပ်ရှားမှုအချိန် လုံလုံလောက်လောက် ရနိုင်မည်မထင်ကြောင်း ၎င်းကပြောသည်။
“အစိုးရနဲ့ပတ်သက်တဲ့ အဖွဲ့အစည်းတွေကတော့ ကွင်းဆင်းပြီးစည်းရုံးနေတာ ကြာလှပြီ။ လုပ်ငန်းရှင်တွေ လုပ်နေတယ်။ ရွေးကောက်ပွဲဝင်မယ့် ၀န်ကြီးတွေက နယ်မြေသတ်မှတ် ပိုင်းခြားခွင့်တွေ လုပ်နေတယ်။ အဲဒီလူတွေကို အချိန်တွေပေးပြီးတော့ ပါတီသစ်တွေက ၀င်ရောက်ယှဉ်ပြိုင်မယ့်သူတွေနဲ့ အနှစ် (၂၀) လောက် အထိုင်ကျနေတဲ့ အန်အယ်လ်ဒီပါတီကိုတောင်မှ စည်းရုံးလှုပ်ရှားခွင့်တွေ၊ ရုံးဖွင့်ခွင့်မပေးတာတွေ စတဲ့ ဒီလိုအခြေခံအချက်အလက်တွေ မပေးဘဲနဲ့ ဘယ်လိုလုပ်ပြီး မှန်ကန်တဲ့ တရားမျှတတဲ့ ရွေးကောက်ပွဲဖြစ်တယ်လို့ ပြောဆိုနိုင်မှာတုန်း” ဟု ဦးအောင်သိန်းက ဆက်လက်ပြောကြားသည်။
ပြီးခဲ့သည့် ၁၉၉၀ ရွေးကောက်ပွဲဥပဒေအရ အန်အယ်လ်ဒီပါတီအနေဖြင့် အနည်းဆုံး (၁) နှစ်နီးပါး ပါတီထူထောင်ခွင့် စည်းရုံးလှုပ်ရှားခွင့်များ ရခဲ့ကြောင်း၊ ယခုမူ ရွေးကောက်ပွဲရက်ကိုပင် မကြေညာနိုင်သေးသည့်အတွက် စစ်အစိုးရပြောနေသည့် ဒီမိုကရေစီကျကျ ရွေးကောက်ပွဲတခုဖြစ်ရန် စံချိန်စံညွှန်းများနှင့် မညီညွတ်နိုင်ကြောင်း ၎င်းက ဆက်လက်ပြောဆိုသည်။
“အခုထလုပ်ပြီး ယှဉ်ပြိုင်ပါတယ်ဆိုတာ အစိုးရနဲ့လိုလားသူတွေအတွက်ပဲ ဖြစ်မှာပေါ့။ အဲလိုရွေးကောက်ပွဲကို လုပ်ဖြစ်လိုက်သည့်တိုင်အောင် လွှတ်တော်ထဲမှာ အစိုးရကို ဝေဖန်နိုင်မယ့်၊ အတိုက်အခံပြုထောက်ပြနိုင်မယ့်၊ အမှန်ကို ရှင်းပြနိုင်မယ့် ပုဂ္ဂိုလ် မပါသလောက် ဖြစ်သွားနိုင်ပါတယ်” ဟု ဦးအောင်သိန်းက ပြောသည်။
အားလုံးပါဝင်နိုင်သည့် ရွေးကောက်ပွဲ ဖြစ်မြောက်ရေးအတွက် နိုင်ငံရေးအကျဉ်းသားများ လွှတ်ပေးရန်၊ ပါတီများကို လုံလောက်သည့် စည်းရုံးလှုပ်ရှားမှု အချိန်ပေးရန်၊ ၁၉၉၀ ရလဒ်ကို ပုံစံတခုဖြင့် အသိပြုရန်တို့ လိုအပ်ပြီး ယင်းလုပ်ဆောင်ချက်များ တခုခု ချို့ယွင်းနေပါက မည်သို့မျှ တရားမျှတသည့် ရွေးကောက်ပွဲလမ်းကြောင်းပေါ်သို့ ရောက်လာနိုင်စရာမရှိကြောင်း ဥပဒေအတိုင်ပင်ခံ ဦးအောင်သိန်းက ထောက်ပြပြောဆိုသည်။
ရွေးကောက်ပွဲဝင်ရန် ပြင်ဆင်နေသည့် ဒီမိုကရက်တစ်ပါတီမှ ဥက္ကဋ္ဌဖြစ်သူ ဦးသုဝေကမူ ပါတီမှတ်ပုံတင်ဥပဒေ၊ ရွေးကောက်ပွဲ ဥပဒေတို့ မထွက်သေးသည့်အတွက် ၎င်းတို့အနေဖြင့် ရွေးကောက်ပွဲ ၀င်ရေး မ၀င်ရေးဆိုသည်မှာ စည်းရုံးလှုပ်ရှားခွင့်ကာလ မည်မျှ ရရှိနိုင်မည်ဆိုသည့် အချိန်ကာလအပေါ် မူတည်သည်ဟု ပြောဆိုသည်။
၎င်းက “တကယ့်တကယ် ပြောရရင်တော့ စည်းရုံးလှုပ်ရှားခွင့်ဆိုတာ တပြည်လုံးလှုပ်ရှားဖို့ဆိုရင် အမှန်အတိုင်းက (၁) နှစ်လောက် လိုတာပေါ့နော်။ အခုဟာက (၁) နှစ်တောင် မရှိတော့ဘူးလေ။ ပါတီတွေက တကယ်ဖွဲ့ပြီးသားဆိုရင်တော့ အရေးမကြီးပါဘူး။ ဒါပေမယ့် ပါတီတွေက အခုမှစဖွဲ့ရမယ်၊ စည်းရုံးရမယ်ဆိုတော့ တော်တော်ခက်ခက်ခဲခဲ လုပ်ယူရမယ်။ လုံလောက်တဲ့အချိန် ကာလရယ်၊ ထွက်လာတဲ့ဥပဒေက ဘာကန့်သတ်ချက်တွေရှိဦးမလဲ ဆိုတာတွေပေါ်မှာလည်း တည်သေးတယ်။ အဲဒါကို ကြည့်ပြီးတော့မှ ပြောလို့ရမှာ။ အခက်အခဲတွေက ဘယ်လောက်ရှိမယ်၊ လုပ်နိုင်၏ မလုပ်နိုင်၏ဆိုတာ စဉ်းစားရမှာပေါ့နော်။ အချိန်လုံလောက်မှုမရှိရင်တော့ ရွေးကောက်ပွဲဝင်ဖို့ စဉ်းစားရမယ့်သဘောရှိပါတယ်” ဟု ပြောသည်။
ခေတ်ပြိုင်မှတဆင့်

၂၀၁၀ ရွေးကောက်ပွဲတွင် မဲရုံများသို့ သွားရောက်မဲမထည့်ဘဲ လူထုပါဝင်ပတ်သက်မှုမရှိသော မတရားသည့် ရွေးကောက်ပွဲအဖြစ် ပြည်သူလူထုအနေဖြင့် ဆန့်ကျင်သွားကြရန် မြန်မာနိုင်ငံ ရှေ့နေများကောင်စီက ယနေ့ ကြေညာချက် ထုတ်ပြန်တိုက်တွန်းလိုက်သည်။
“မြန်မာပြည်မှာ ရွေးကောက်ပွဲ (၅) ခါ လုပ်ခဲ့တဲ့အထဲမှာ မဲမပေး မနေရ၊ မဖြစ်မနေ မဲပေးရမယ်ဆိုတဲ့ ဥပဒေ ပြဋ္ဌာန်းထားတာမျိုး မရှိခဲ့ဘူး။ မဲဆန္ဒရှင်တွေရဲ့ သဘောအတိုင်း မဲပေးလိုရင် ပေးနိုင်ခွင့် ရှိတဲ့စနစ်ကိုပဲ ကျင့်သုံးထားတယ်။ ကျနော်တို့က အခြေအနေ အရပ်ရပ်ကို သုံးသပ်ပြီး နအဖလုပ်မယ့် ၂၀၁၀ ရွေးကောက်ပွဲဟာ တရားမျှတမှု၊ လွတ်လပ်မှု မရှိတဲ့ ရွေးကောက်ပွဲပဲ ဖြစ်တယ်။ ဒါကြောင့် မဲရုံကိုသွားပြီး မဲမထည့်ကြဖို့ ပြည်သူတွေကို တိုက်တွန်းတာ ဖြစ်တယ်” ဟု မြန်မာနိုင်ငံ ရှေ့နေများကောင်စီ ဥပဒေ ရေးရာသုံးသပ်ရေးဌာနမှ တာဝန်ခံ ဦးမျိုးက ပြောကြားသည်။
ရွေးကောက်ပွဲ ကျင်းပရေးကော်မရှင်ဥပဒေ၊ နိုင်ငံရေးပါတီများ မှတ်ပုံတင်ခြင်း ဥပဒေနှင့် ပြည်သူ့လွှတ်တော် ရွေးကောက်ပွဲ ဥပဒေ စသည့် ဥပဒေများကို ယခုအထိ ထုတ်ပြန်ပေးခြင်း မရှိသေးသော်လည်း နအဖစစ်အစိုးရနှင့် ၎င်းတို့၏ လက်ဝေခံများက ရွေးကောက်ပွဲအတွက် လက်ဦးမှုရယူကာ ကြိုတင်ပြင်ဆင်မှုများ ပြုလုပ်နေကြခြင်း၊ အတိုက်အခံ နိုင်ငံရေးပါတီများကို အမျိုးမျိုးဖိနှိပ်ကာ စစ်အာဏာရှင်စနစ် သက်ဆိုးရှည်စေရေးကိုသာ လုပ်ဆောင်နေခြင်းကြောင့် ၂၀၁၀ ရွေးကောက်ပွဲသည် တရားမျှတမှုနှင့် လွတ်လပ်မှုမရှိသည့် ရွေးကောက်ပွဲသာဖြစ်ကြောင်း ကြေညာချက်တွင် ဖော်ပြထားသည်။
ထိုကဲ့သို့ ရွေးကောက်ပွဲဆိုင်ရာ ဥပဒေများကို ထုတ်ပြန်ခြင်း မရှိသေးသည့်အတွက် အတိုက်အခံ နိုင်ငံရေးပါတီများ၏ စည်းရုံးရေး လုပ်ငန်းများ လုံလောက်သည့်အချိန်ကာလ ရရှိတော့မည်မဟုတ်ကြောင်း၊ မဲပေးနိုင်သူ စာရင်း၏ ထက်ဝက်က မဲရုံများသို့ သွားရောက်၍ မဲပေးခြင်းမပြုခဲ့လျှင် ရွေးကောက်ပွဲသည် တရားမဝင်သည့် လူထုပါဝင်မှုမရှိသော ရွေးကောက်ပွဲအဖြစ် သတ်မှတ်နိုင်ကြောင်း ဦးမျိုးက ပြောသည်။
လွတ်လပ်၍ တရားမျှတသော ရွေးကောက်ပွဲတရပ် ကျင်းပနိုင်ရန်အတွက် မြန်မာ့နိုင်ငံရေးအခြေအနေ တည်ငြိမ်အေးချမ်းခြင်း မရှိသေးကြောင်းနှင့် နိုင်ငံတကာ လူ့အခွင့်အရေး ဥပဒေ၊ ဒီမိုကရေစီ စံချိန်စံညွှန်းများနှင့် ကိုက်ညီခြင်း မရှိသည့် ဥပဒေ (၁၃) ရပ်ကို နအဖစစ်အစိုးရက ဖျက်သိမ်းခြင်း မရှိသေးကြောင်း မြန်မာနိုင်ငံ ရှေ့နေများကောင်စီက ထောက်ပြထားသည်။
ဦးမျိုးက “ပြည်သူတဦးကို တလွဲအာဏာသုံးပြီး အတင်းမဲပေးဖို့ အစိုးရတရပ်အနေနဲ့ လုပ်ခွင့်မရှိဘူး။ စိုက်ပျိုးရေးချေးငွေ၊ အခြားဖွံ့ဖြိုးရေးဆိုင်ရာ ချေးငွေတွေနဲ့ ဆွယ်ပြီး မဲပေးအောင် လုပ်တာဟာ အဂတိလိုက်စားမှုဆိုင်ရာ Corruption ဥပဒေနဲ့ တရားစွဲလို့ရတယ်” ဟု ခေတ်ပြိုင်သို့ ပြောကြားသည်။
ခေတ်ပြိုင်မှတဆင့်

မြန်မာနိုင်ငံတွင် ၂၀၁၀ ရွေးကောက်ပွဲကို လွတ်လပ်ပြီး တရားမျှတစွာ ကျင်းပပေးမည် ဖြစ်ကြောင်း အာဆီယံ အတွင်းရေးမှူးချုပ် ဆူရင် ပစ်ဆူဝမ် (Surin Pitsuwan) က ယမန်နေ့က ပြောကြား လိုက်သည်။

၂၀၀၉ ခု နိုဝင်ဘာ လကုန်ပိုင်းက ထိုင်းနိုင်ငံ ဘန်ကောက်မြို့တွင် ပြုလုပ်သော နာဂစ်မုန်တိုင်း ဒုက္ခသည်များ ကူညီရေး အစည်းအဝေး သတင်းစာ ရှင်းလင်းပွဲတွင် တွေ့ရသည့် မစ္စတာ ဆူရင် ပစ်ဆူဝမ် (ဓာတ်ပုံ – Reuters)

ဗီယက်နမ် နိုင်ငံတွင် ပြုလုပ်သော အာဆီယံ နိုင်ငံခြားရေး ၀န်ကြီးများ အစည်း အဝေးတွင် ယခုကဲ့သို့ ဆူရင်ပစ်ဆူဝမ်က သတင်းထောက် များကို ပြောကြားခဲ့ခြင်း ဖြစ်သည်။

“မြန်မာပြည် ပြဿနာက ဒီနှစ်ထဲမှာ ဖြေရှင်းနိုင် လိမ့်မယ်လို့ အာဆီယံ ၀န်ကြီးတွေ တော်တော်လေး မျှော်လင့်ထား ကြတယ်။ ဒါမှသာ အာဆီယံဟာ နိုင်ငံတကာနဲ့ ဆက်ဆံရေး၊ ပူးပေါင်း ဆောင်ရွက်ရေး တွေကို ရှေ့တိုးပြီး လုပ်ဆောင်နိုင်မှာ ဖြစ်ပါတယ်” ဟု ဆူရင် ပစ်ဆူဝမ်က ပြောသည်။

အင်ဒိုနီးရှား နိုင်ငံခြားရေး ၀န်ကြီး မာတီ အမ်နာတာလဂါဝါကမူ “ဒေါ်အောင်ဆန်း စုကြည်နဲ့ သူ့ပါတီက လုပ်ဖော်ကိုင်ဖက်တွေ အဆက်အသွယ်ရှိတာကို ကျနော်တို့ လိုလားပါတယ်။ ဒါက ရွေးကောက်ပွဲကို NLD က ဘယ်လို ချဉ်းကပ်မယ်၊ ၀င်မယ်၊ မ၀င်ဘူး ဆိုတဲ့ အဆုံးအဖြတ်ကို ဖော်ဆောင်နိုင်လိမ့်မယ်”ဟု ပြောသည်။

ထို့အပြင် မြန်မာနိုင်ငံတွင်၂၀၁၀ ရွေးကောက်ပွဲကို လာမည့် ဒုတိယ နှစ်ဝက်၌ ပြုလုပ်ကျင်းပနိုင်ဖွယ်ရှိကြောင်း ထိုင်း နိုင်ငံခြားရေး ၀န်ကြီး ကဆစ် ဖိရုမ်းကလည်း ပြောသည်။ 

“ရွေးကောက်ပွဲ ကျင်းပဖို့ အနီးစပ်ဆုံး အချိန်က ဒုတိယ နှစ်ဝက်ပိုင်းလောက်မှာ ဖြစ်လိမ့်မယ်လို့ ယူဆရပါတယ်”ဟု ထိုင်း နိုင်ငံခြား ရေး ၀န်ကြီး ကဆစ်၏ ပြောဆိုမှုကို ကိုးကား၍ ရိုက်တာ သတင်း တပုဒ်တွင် ဖော်ပြထားသည်။

နိုင်ငံရေးပါတီများ မှတ်ပုံတင်ခြင်း ဥပဒေ၊ ရွေးကောက်ပွဲ ဥပဒေ တို့အတွက် ပြင်ဆင် နေမှုများမှာ ရာခိုင်နှုန်း ၆၀၊ ၇၀ ခန့် ပြီးဆုံး သွားပြီဖြစ်ကြောင်းလည်း ကဆစ်က ဆိုသည်။

မြန်မာနိုင်ငံတွင် ရွေးကောက်ပွဲဝင်ရန် ပြင်ဆင်ထားသော ဒီမိုကရက်တစ်ပါတီ ဥက္ကဌ ဦးသုဝေက“အမှန်အတိုင်းဆိုရင် စည်းရုံးရေး ဆင်းဖို့အတွက် တနှစ်လောက်တော့ လိုအပ်တယ်၊ တနှစ်လောက် လိုတယ်ဆိုတာက နိုင်ငံရေး ပါတီတွေက အခုမှ စဖွဲ့ကြတာကိုး  ပါတီတွေက ဖွဲ့ပြီးသား ရှိနေတယ်ဆိုရင် အချိန်အများကြီးမလိုဘူး”ဟု ဧရာဝတီသို့ ပြောသည်။

၁၉၉၀ ပြည့်နှစ် ရွေးကောက်ပွဲ ပြုလုပ်စဉ်က ဥပဒေပိုင်းဆိုင်ရာ ပြင်ဆင်မှုများအတွက် အချိန်များစွာ မယူခဲ့ကြောင်း တွေ့ရသည်။
၁၉၉၀ ရွေးကောက်ပွဲ အတွက် ဥပဒေကို အာဏာသိမ်းပြီး ၈ လ အကြာတွင် ထုတ်ပြန်ခဲ့ခြင်း ဖြစ်သည်။

ဥပဒေကို ၁၉၈၉ မေလတွင် ထုတ်ပြန်ခဲ့သောကြောင့် နိုင်ငံရေး ပါတီများသည် ၁၉၉၀ မေလ ရွေးကောက်ပွဲအတွက် မဲဆွယ်ချိန် တနှစ်ရခဲ့သည်။

ထိုစဉ်က ရွေးချယ်ခံရသော ပြည်သူ့လွှတ်တော် ကိုယ်စားလှယ်များအတွက် အစိုးရဖွဲ့နိုင်သော လွှတ်တော်ခေါ်ယူခွင့်ပေးခြင်း မရှိဘဲ အစိုးရက အမျိုးသားညီလာခံကို ဦးစီးကျင်းပကာ လက်သင့်ရာ ကိုယ်စားလှယ်များဖြင့် အခြေခံဥပဒေ ရေးဆွဲစေခဲ့သည်။

၁၉၉၃ ခုနှစ်တွင် စတင်ရေးဆွဲခဲ့သော အခြေခံဥပဒေသည် ၂၀၀၈ ခုနှစ်တွင် ပြီးဆုံးခဲ့သည်။

ယခု စီစဉ်ထားသည့် ၂၀၁၀ ရွေးကောက်ပွဲသည် နိုင်ငံတကာမှ တောင်းဆိုနေသည့်အတိုင်း လွတ်လပ်ပြီး တရားမျှတသည့် ရွေး ကောက်ပွဲ ဖြစ်နိုင်ရန် အလားအလာ နည်းပါးကြောင်း၊ အဘယ်ကြောင့်ဆိုသော် မြန်မာ့ဒီမိုကရေစီခေါင်းဆောင် ဒေါ်အောင်ဆန်းစု ကြည်၊ ကိုမင်းကိုနိုင်နှင့် အတိုက်အခံ နိုင်ငံရေးခေါင်းဆောင်များ၊ တိုင်းရင်းသားခေါင်းဆောင်များအား ဖမ်းဆီးထားခြင်းမှ ပြန်လွှတ် ပေးခြင်းမရှိသေးသည့်အတွက် ယင်း ရွေးကောက်ပွဲသည် တရားမျှတမှုရှိလိမ့်မည် မဟုတ်ကြောင်း နိုင်ငံရေးသုံးသပ်သူများက ဆိုသည်။
ဧရာဝတီမှတဆင့်

စစ်အစိုးရ ကျောထောက်နောက်ခံပြု ကြံ့ခိုင်ဖွံ့ဖြိုးရေး အသင်းက ၂ဝ၁ဝ နှစ်ဦးပိုင်းမှ စတင်၍ ရန်ကုန်တွင် လူထုစည်ရုံးရေး လုပ်ငန်းများ ပိုမိုလုပ်ဆောင်လာကြောင်း မြို့ခံများက ပြောဆိုကြသည်။

၂ဝဝ၉ ခုနှစ်တွင် လမ်းများကို ကွန်ကရစ်ခင်းခြင်း၊ မြို့နယ်များတွင် နာရေးကူညီမှုအသင်းများ ထူထောင်ခြင်း၊ အခမဲ့ မျက်စိနှင့် မျက်မှန် စမ်းသပ်ခြင်း၊ အခမဲ့ ဆေးပေးခန်းနှင့် ကျူရှင်သင်တန်းများ ဖွင့်လှစ်ခြင်း၊ ငွေချေးခြင်း၊ ရေမြောင်းများ တူးဖော်ခြင်းအပြင် ရန်ကုန်ကို နေ့စဉ်ပေးဝေသည့် သောက်သုံးရေ လုံလောက်စေရန် မြို့လည်ဧရိယာတဝိုက် အဝီစိတွင်းများ တူးဖော်ပေးခဲ့သည်ဟု ဆိုသည်။

ထိုသို့သော စည်းရုံးရေး လုပ်ငန်းများအပြင် ယခုနှစ်တွင် ရန်ကုန် ဆင်ခြေဖုံး ၁ဝ မြို့နယ်ရှိ ဆင်းရဲသားများ၏ နေအိမ်ချို့ယွင်းနေမှုများကိုပါ ပြန်လည်၍ ပြုပြင်တည်ဆောက်ပေးနေကြောင်း သိရသည်။

ဒဂုံမြို့သစ်တောင်ပိုင်း၊ တောင်ဥက္ကလာပ၊ မြောက်ဥက္ကလာပ၊ သင်္ဃန်းကျွန်း၊ ရွှေပြည်သာ၊ လှိုင်သာယာ၊ ဒေါပုံ၊ သာကေတ၊ ကြည့်မြင်တိုင်နှင့် မရမ်းကုန်းတို့တွင် တမြို့နယ်လျှင် အိမ်ခြေ ၁ဝ လုံးနှုန်းဖြင့် တည်ဆောက်ပေးခြင်း ဖြစ်သည်။

”အခုကျနော်တို့အဖွဲ့က ရန်ကုန်မှာ မြို့နယ် ၁ဝ မြို့နယ်မှာ နေအိမ်တွေ ပြုပြင်ဖို့ အခက်အခဲရှိတဲ့ ဆင်းရဲသား လက်လုပ်လက်စားတွေအတွက် အခမဲ့ အသစ်ပြန်ဆောက်ပေးတာ ဖြစ်တယ်။ နေအိမ်တလုံးကို ကုန်ကျမှုက ၇ သိန်းနဲ့ ၈ သိန်းကြား ရှိတယ်” ဟု ဒဂုံမြို့သစ်တောင်ပိုင်းမှ ကြံ့ဖွံ့အဖွဲ့ဝင် တဦးက ပြောသည်။

လှိုင်သာယာမြို့နယ်တွင်မူ နေအိမ်တည်ဆောက်ပေးသည့် ကုန်ကျငွေအတွက် တလလျှင် ကျပ် ၁ဝဝ နှုန်းဖြင့် ပြန်လည်ပေးဆပ်ရမည်ဖြစ်ကြောင်းနှင့် နေအိမ်ဆောက်လုပ်ပေးခံရသူများမှာ ကြံ့ဖွံ့အသင်းဝင် အများစုသာဖြစ်ကြောင်း သိရသည်။

လှိုင်သာယာ ကြံ့ခိုင်ဖွံ့ဖြိုးရေးမှ တာဝန်ရှိသူတဦးက “ရပ်ကွက်မှာ အိမ်မပြုပြင်နိုင်တဲ့သူတွေ၊ ဒေသခံတွေ၊ အသင်းသားတွေ၊ တကယ်မဆောက်နိုင်တဲ့ သူတွေအတွက် ဦးစားပေး လုပ်ဆောင်နေတာပါ။ တလကို ၁ဝဝ ပြန်ဆပ်ရမယ်။ ၅ သိန်းတန် အိမ်တွေအတွက် ၅ သိန်း မပြည့်မချင်း တလကို ၁ဝဝ ပေးရမယ်” ဟု မဇ္ဈိမကို ပြောသည်။

ဒဂုံမြို့သစ်တောင်ပိုင်းတွင် အိမ် ၁ဝ လုံးနှင့် ကြည့်မြင်တိုင်အပိုင် ရန်ကုန်တဖက်ကမ်းရှိ ဆိပ်ကြီး ဥမြငါးဇင်တွင် ၁ဝ လုံး တည်ဆောက်ပြီးဖြစ်ကြောင်းနှင့် ဒုတိယအကြိမ်တွင်လည်း တမြို့နယ်လျှင် နေအိမ် ၁ဝ လုံးကျစီ ဆောက်လုပ်ပေးသွားဦးမည်ဖြစ်ကြောင်း ရန်ကုန်တိုင်း ကြံ့ဖွံ့အဖွဲ့ဝင် တဦးက ပြောသည်။

ကြံ့ဖွံ့မှ ပြန်ဆောက်ပေးသော အိမ်များကို တသက်တာ  ရောင်းချခြင်းများ မပြုလုပ်ပါကြောင်း အိမ်ပိုင်ရှင်များက လက်မှတ်ထိုးရကြောင်း သိရသည်။

”ကျနော်တို့အိမ်က ၁ဝ ပေ၊ ပေ ၄ဝ ပတ်လည်ပေါ့။ မြေအမည်ပေါက်တယ်။ ရောင်းချတာ၊ ပေါင်ထားတာ မရှိဘူး။ ပြောရရင် အရှုပ်အရှင်း ကင်းတယ်။ သူတို့ဆောက်ပေးတာက ကာလတန်ဖိုး ၇ သိန်း တန်လောက် ရှိတယ်လို့ ပြောတယ်။ အုတ်ခံထားတယ်။ အုတ်ကို တဝက်ကာတယ်။ သံဇကာတွေကို အကွက်ခတ်ပေးတယ်။ အဲဒီ သံဇကာမှာ တံခါးမပါဘူး။ အရင်က ကျနော်တို့ အိမ်က ထရံကာတာ။ အိမ်က လုံနေတာပေါ့။ ခုတော့ သံဇကာကွက်နဲ့ ဆိုတော့လေ တံခါးမပါတော့ ဟင်းလင်းပြင်လိုပေါ့။ တံခါးက တပ်မှဖြစ်မယ်၊ ပြူတင်းတံခါးကို” ဟု ဒဂုံမြို့သစ်တောင်ပိုင်း နေအိမ်ပြန်တည်ဆောက်ပေးခံရသူက မဇ္ဈိမကို ပြောသည်။

ရန်ကုန်မြို့တော်ဝန် ဗိုလ်မှူးချုပ် အောင်သိန်းလင်းသည် ရန်ကုန်တိုင်း ကြံ့ဖွံ့ ဗဟိုအလုပ်အမှုဆောင် အဖွဲ့ဝင်နှင့် ရန်ကုန်တိုင်း တာဝန်ခံဖြစ်ကာ စည်ပင်လုပ်ငန်းများထက် ကြံ့ဖွံ့လုပ်ငန်းများကို ဦးစားပေးဆောင်ရွက်လေ့ရှိပြီး၊ လူထုစည်းရုံးရေးကို အဓိက လုပ်ဆောင်နေသူဖြစ်ကြောင်း ရန်ကုန်မြို့ခံများက ဆိုသည်။

လူမှုရေးအသင်းအဖြစ် ၁၉၉၃ ခုနှစ်တွင် စစ်အစိုးရက စတင်တည်ထောင်ခဲ့သည့် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးအသင်းသည် ပြည်သူ့အကျိုးပြု လုပ်ငန်းများ လုပ်ဆောင်ခဲ့ခြင်း မရှိဘဲ အတိုက်အခံများနှင့် ဆန္ဒပြသူများကို ဖိနှိပ်ဖြိုခွဲရာတွင် တက်ကြွစွာ ပါဝင်လေ့ရှိကာ ၂ဝဝ၈ အခြေခံ ဥပဒေ အတည်ပြုရေးအတွက် အားသွန်ခွန်စိုက် လုပ်ဆောင်ခဲ့သည့် အဖွဲ့အဖြစ် လေ့လာသူများက ရှုမြင်ကြသည်။

လတ်တလော နေအိမ်တည်ဆောက်ပေးသည့် လုပ်ငန်းများသည်လည်း ယခုနှစ်တွင် ကျင်းပမည်ဟု စစ်အစိုးရက ကြေညာထားသည့် ရွေးကောက်ပွဲများနှင့် ဆက်စပ်နေနိုင်ကြောင်း ထိုင်းနိုင်ငံအခြေစိုက် NDD ခေါ် ဒီမိုကရေစီနှင့် ဖွံ့ဖြိုးတိုးတက်ရေး အင်အားစုမှ ဥက္ကဋ္ဌဖြစ်သူ ဒေါ်ခင်ဥမ္မာက သုံးသပ်သည်။ 

“၂ဝ၁ဝ ရွေးကောက်ပွဲ လုပ်မယ့်ဟာနဲ့ ဆက်စပ်နေတယ်။ ကြံ့ခိုင်ဖွံ့ဖြိုးရေးနာမည်နဲ့ မဟုတ်တောင်မှ အဖွဲ့ဝင် တချို့က လာမယ့်ရွေးကောက်ပွဲမှာ နအဖ အလိုကျ ရွေးကောက်ပွဲဝင်မယ့် ပါတီမျိုးတွေအနေနဲ့ ဝင်ပြိုင်မယ့် အခြေအနေမျိုးတွေ တွေ့နေရတယ်။ သူတို့အနေနဲ့ အခုချိန်မှာ မျက်နှာရအောင် လုပ်ဆောင်နေတဲ့ သဘောမျိုး တွေ့ရတယ်” ဟု သူက ပြောသည်။
မဇ္ဈိမမှတဆင့်

အိန္ဒိယ မြန်မာနယ်စပ် အခြေစိုက် နာဂ အမျိုးသား ဒီမိုကရေစီ အဖွဲ့ချုပ် (NNLD) က ဒေါ်အောင်ဆန်းစုကြည် အပါအ၀င် နိုင်ငံရေး အကျဉ်းသားများ လွတ်မြောက်ရေး အတွက် စစ်အစိုးရကို တောင်းဆိုလိုက်ပြီး ၂၀၁၀ ပြည့်နှစ်တွင် ရွေးကောက်ပွဲပြုလုပ်မည့် အစီအစဉ်ကို ကန့်ကွက် ရှုတ်ချကြောင်း ယနေ့ ထုတ်ပြန် ကြေညာလိုက်သည်။

နှစ်သစ်ကူးပွဲတော်တခုတွင် တွေ့ရသော နာဂ ကလေးငယ်များ (ဓာတ်ပုံ – saila110)

စစ်အစိုးရစိတ်ကြိုက် တဖက်သတ် ရေးဆွဲ အတည်ပြုထားသည့် အခြေခံဥပဒေကို အမှီပြု၍ ပြုလုပ်မည့် ရွေးကောက်ပွဲသည် တရားမျှတမှု ရှိမည် မဟုတ်ဘဲ စစ်အာဏာရှင်စနစ်ကို အထောက်အပံ့ ပေးမည်သာ ဖြစ်ကြောင်း NNLD က ဆိုသည်။

“၂ဝဝ၈ မှာ လုပ်ခဲ့တဲ့ အခြေခံဥပဒေ ထောက်ခံတဲ့ ဆန္ဒခံယူပွဲဟာ ပြည်သူတွေရဲ့ ဆန္ဒကို ခံယူတာ မဟုတ်ဘဲ အတင်းအဓမ္မ သဘောမတူလည်း တူရမယ်ဆိုတဲ့ ပုံစံမျိုးနဲ့ လုပ်ခဲ့တာ။ ထပ်ပြီးတော့ ဒါကို အခြေခံပြီးတော့ ပြုလုပ်မယ် ဆိုတဲ့ ရွေးကောက်ပွဲဟာ အမှန်ဖြစ်လာဖို့က မယုံကြည်တဲ့အတွက် ကျနော်တို့က လုံးဝ အဲ့ဒါ ကန့်ကွက်တယ်” ဟု NNLD ဥက္ကဋ္ဌ ဦးစောဆက ဧရာဝတီသို့ ပြောသည်။

စစ်အစိုးရ၊ ဒီမိုကရေစီ အင်အားစု၊ တိုင်းရင်းသား အင်အားစုများ သုံးပွင့်ဆိုင် ဆွေးနွေးပြီး အခြေခံ ဥပဒေ ပြန်လည် ပြင်ဆင်သုံးသပ်ရန် လိုအပ်သည်ဟု သူကဆိုသည်။

“ဒီသုံးပွင့်ဆိုင်ကနေ စပြီးတော့ နိုင်ငံရေးဆွေးနွေးမယ်၊ ပြီးတော့ အခြေခံ ဥပဒေဟာ ပြန်ပြီးတော့ ရေးဆွဲရမယ်။ အခု စစ်တပ်က သူကြိုက်တဲ့ ပုံစံ၊ တဦးတည်း တယောက်တည်းက ဆွဲထားတဲ့ အခြေခံ ဥပဒေ ဖြစ်နေတယ်” ဟု သူက ဆက်ပြောသည်။

NNLD သည် ၁၉၈၉ ခုနှစ်မှ စတင်ပြီး အိန္ဒိယမြန်မာနယ်စပ်တွင် လှုပ်ရှားနေသော အဖွဲ့ ဖြစ်သည်။ ယနေ့ NNLD က ထုတ်ပြန်သော ၂၀၁၀ ရွေးကောက်ပွဲနှင့် ပတ်သက်သည့် ကြေညာချက်တွင် နာဂတောင်တန်းဒေသကို နာဂပြည်နယ်အဖြစ် သတ်မှတ်လိုသည်ဟုလည်း ဖော်ပြထားသည်။

နာဂပြည်နယ်အဖြစ် ၎င်းတို့ သတ်မှတ်လိုသည့် ဒေသတွင်  စစ်ကိုင်းတိုင်း အနောက်မြောက်ပိုင်းဒေသရှိ တမူး၊ မော်လိုက်၊ ဖောင်းပြင်၊ ဟုမ္မလင်း၊ လေရှီး၊ ခန္တီး၊ လဟယ်၊ နန်းယွန်း စသည့် မြို့နယ်များနှင့် ကချင်ပြည်နယ်အတွင်းရှိ တနိုင်းမြို့နယ်တို့ ပါဝင်သည်။  ထိုမြို့နယ်များသည် နာဂတောင်တန်းဒေသတွင် တည်ရှိသည်။

ယခုအခါ အာဏာပိုင်တို့က နာဂတိုင်းရင်းသားများ နေထိုင်ကြရာ ထိုဒေသများတွင် ၂၀၁၀ ရွေးကောက်ပွဲနှင့် ပတ်သက်ပြီး မက်လုံးပေး စည်းရုံးနေသည် ဟုလည်း သူက ဆိုသည်။ ထိုဒေသတွင် ရွေးကောက်ပွဲဝင်ရန် ပြင်ဆင်နေသူ ဒေသခံများကိုလည်း သူက အပြစ်တင်လိုက်သည်။

“ဒီလူတွေဟာ နိုင်ငံရေးမှာ နာဂပြည်သူတွေကို ကိုယ်စားပြုမယ့် ပုဂ္ဂိုလ်တွေ မဟုတ်ဘူး။ သူတို့ဟာ သမိုင်းတရားခံတွေပဲလို့ ကျနော်တို့က ဒီလိုပဲ ပြောဖို့ရှိတယ်” ဟု သူက ပြောသည်။

နာဂပြည်သူများ နေထိုင်ရာ ဒေသမှာ လမ်းပန်း ဆက်သွယ်ရေး ညံ့ဖျင်းမှုကြောင့် ပညာရေး၊ ကျန်းမာရေး၊ လူမှုရေး ဖွံ့ဖြိုးမှု နှောင့်နှေးနေသည်။
ဧရာဝတီမှတဆင့်